'ბრიუსელში ქვეყნისთვის წარმატებული ვიზიტის დამალვა ზოგიერთი მედიასაშუალების მიერ გულსატკენია''
ორშაბათი, 08 ოქტომბერი, 2018 - 17:20

ამის შესახებ საქართველოს თავდაცვის მინისტრმა ჟურნალისტებთან შეხვედრისას განაცხადა.

ჩვენი ქვეყნის მთავარი სტრატეგიული პარტნიორის, ამერიკის შეერთებული შტატების თავდაცვის მდივანთან, ბატონ მატისთან ჩემი შეხვედრა, სადაც მხოლოდ მხარდამჭერი განცხადებები მოვისმინე, 45 წუთი გაგრძელდა, თუმცა აღნიშნული შეხვედრა ცალკეულმა მედიასაშუალებებმა არ გააშუქეს, რაც გულდასაწყვეტია“, -  აღნიშნა ლევან იზორიამ.

როგორც თავდაცვის მინისტრმა პრესკონფერენციაზე განმარტა, ქვეყნის საგარეო კურსი საქართველოს ჩრდილოატლანტიკურ სივრცეში ინტეგრაციაა და ამ მიმართულებით გადადგმული ნაბიჯების შესახებ საზოგადოების ინფორმირება მნიშვნელოვანია.

ჩვენ ამ ქვეყნის შვილები ვართ და ყველამ მხარი უნდა დავუჭიროთ იმ კურსს რასაც ხალხი ირჩევს და რასაც ჩვენი ქვეყნის ჩრდილოატლანტიკურ სივრცეში გაწევრიანება ჰქვია. როდესაც ვხვდები ჩვენი მთავარი სტრატეგიული პარტნიორის, აშშ- თავდაცვის მდივანს ბატონ მატისს, რომელიც სასაუბროდ 45 წუთს გვითმობს და ეს შეხვედრა ცალკეულ სატელევიზო საშუალებებში არ შუქდება, ჩემთვის ძალიან გულსატკენი ფაქტია. მე შეიძლება ბრალდებები გაღიმებულმა მოვისმინო, რადგან მართალი ვარ, გარკვეულ კრიტიკას ძალიან მშვიდად და საღი გონებით შევხვდე, მაგრამ ასეთი ფაქტების მიმართ ახსნას ვერ ვპოულობ. ეს არის ზეპარტიული თემა, ეს არის ხალხის გადაწყვეტილება და გამოწვევა, რომ ამ ჰიბრიდული შემოტევების პირობებში, ჩვენ ერთი ცენტრალური ხაზი გამოვკვეთოთ, სადაც საგარეო კურსს მაქსიმალური ძალისხმევით დავუჭერთ მხარს. ამერიკის შეერთებული შტატების თავდაცვის მდივანთან შეხვედრაზე მხოლოდ მხარდამჭერი განცხადებები მოვისმინე, არა ჩემთვის ან ჩემი მეგობრისთვის, არამედ, მოსახლეობისთვის, ამის შესახებ კი ცალკეული მედიასაშუალებების მხრიდან, მოსახლეობის ინფორმირება არ მომხდარა, რაც გულდასაწყვეტია“,- განაცხადა საქართველოს თავდაცვის მინისტრმა.

 

ArtMedia.ge

მსგავსი სიახლეები

ექსკლუზივი